Buruntzaldeko sei udalek —Andoain, Astigarraga, Hernani, Lasarte-Oria, Urnieta eta Usurbil— urteak daramatzate Apelliduak Abizendu programa bultzatzen, herritarrei beren abizenak eta izenak euskalduntzeko, hau da, euskarazko grafiara egokitzeko aukera ematen dien ekimena.
2000. urtean programa martxan jarri zenetik, eskualdeko 1.000 lagunek baino gehiagok egin dute aldaketa, eta ekimenak martxan jarraitzen du, identitate pertsonaleko datuetan ere euskararen erabilera erraztu eta normalizatzeko helburuarekin.
Doako tramite erraz eta hurbila
Buruntzaldean bizi den edonork eska dezake aldaketa bere udalerriko Bake Epaitegian edo Erregistro Zibilean.
Prozesua doakoa eta oso erraza da:
- NANaren kopia bat eta jaiotza-agiri literala (Bake Epaitegian bertan eskura daiteke) behar dira.
- Seme-alabak izanez gero, familia-liburua edo haren ordezko dokumentu bat ere aurkeztu behar da.
Behin dokumentuak aurkeztuta, aldaketa zuzenean tramitatzen da. Izen-abizenak egokitzeko erreferentzia eredua Euskaltzaindiaren EODA (Euskal Onomastikako Databankena) da, eta edozein zalantza izanez gero, epaitegian bertan eska daiteke orientazioa.
Bizirik jarraitzen duen ekimen bateratua
Apelliduak Abizendu herritarren egunerokoan euskara sustatzeko Buruntzaldeko sei udalek aurrera eramaten duten ekimen bateratuetako bat da. Bake Epaitegiekin elkarlanean, euskara norberaren identitatean ere aukera erraz eta irisgarri bihurtzea da helburua.
Udalek gogorarazten dute norbanakoaren eskubidea dela eta interesa duen pertsona oro informatzera eta pausoa ematera animatzen dute. Izena edo abizenak euskalduntzea euskaraz bizitzeko beste modu bat da.
Informazio gehiago HEMEN
