MEET Trantsiziorako Herrien arteko Europako topaketetan parte hartzen ari da Hernaniko Udala. Portugalen abiatu ziren topaketak iazko irailean.

Ordutik hona, Frantziak eta Italiak hartu dute proiektu horren saioak antolatzeko ardura eta martxoan Hernaniren txanda izango da. Meet topaketak gure herrian antolatuko ditugu eta gurean hartuko ditugu Europako beste herrietako ordezkariak. Herritar guztiei irekiak dira topaketa horiek. Bi modalitate izango dira: telematikoak eta aurrez aurrekoak.

1. TOPAKETA (TELEMATIKOA): MARTXOAK 2 ETA 3, GOIZEZ. Berdintasuneko, kulturartekotasuneko eta tokiko burujabetzen eremuko politika publikoen kokapena eta marko orokorra landuko ditugu, hau da, eremu horretako egoera zein den, Hego Euskal Herriko eta EAEko politika publikoen norabidea, ardatzak eta gakoak zeintzuk diren, zein ibilbide egin den, oro har, eta lorpenak, zailtasunak eta erronkak.

2. TOPAKETA (PRESENTZIALA): MARTXOAK 15 ETA 16, EGUN OSOZ. Hernaniko Udalak berdintasunean, kulturartekotasunean eta tokiko burujabetzen eremuan garatutako politikak eta egitasmoak ezagutuko ditugu, gainerako udalerrietan egindakoa partekatu eta talde-gogoeta eta ikaspenak landuko ditugu.