Gipuzkoako Foru Aldundiaren eta Kutxaren babesarekin, eta Bizkaiko Foru Aldundiaren laguntzarekin, Ipupomamua izeneko telebista saio berria jarriko dute martxan ETB1 eta ETB3 kateetan.
Gipuzkoako Foru Aldundiak, Kutxak eta ETBk haur eta gazte literatura hedatu eta etxeetara zabaltzeko asmoz, Ipupomamua telebista saioaren 35 atal osatzeko konpromisoa hartu dute. Euskarazko saioak 25 minutuko iraupena izango du eta ETB1en ostiraletan emango dute 19:30etik aurrera. ETB3 katean, berriz, ostegunetan emango dute.
Nagore Aranburu aktore azpeitiarrak aurkeztuko du saioa eta ekainera arte iraungo du. Saioa ibiltaria izango denez, herriz-herri mugituko dira. Pertsonaia ezagunak elkarrizketatuko dituzte, beti ere literaturarekin harremana dutenak, eta ipuin kontaketak ere izango dira saio guztietan.
Etorkizunean sortuko duten Ipupomamua parkearen aurrekaria izan nahi du telebista saioak.